Пора монологиСалом! Менинг исмим — Пора. Мен ҳақимда турфа хил ёмон гаплар юради, лекин барибир мени кўпчилик ёқтиради. Мен одамзод тарихида мансаб тушунчаси пайдо бўлганидан буён мавжудман. Мени йўқ қилишга асрлар давомида ҳаракат қилиб келишган, лекин йўқ қила олишмаган (йўқ қила олишмайди ҳам!).Мен шундай чиройлиманки, мени кўрган ҳар қандай одам ўзини йўқотиб қўяди. Мени бермаган ва мени олмаган одам ер юзида саноқли. Менинг жуда кўплаб кўринишим бор. Менга қарши курашадиган аксарият одамларнинг ўзи ҳам мени севади. Айниқса, омма олдида менга қарши кўплаб амалдорлар фикр билдиради, лекин жарангдор нутқи тугаши билан хонасида конвертлар ичида келишимни интиқлик билан кутади.Мен билан данғиллама уйлар, қимматбаҳо машиналар ва ҳоказолар қўлга киритилади. Мен билан эҳтиёт бўлиб муомала қилмаганлар менга бўлган муҳаббатлари учун ё панжара ортига кетади, ё мени тегишли жойларга етказибгина қутилиб қолади. Мен ҳар қандай наркотикдан ҳам кучлиман — менга ўрганиб қолган одам тушларида ҳам мени кўради. Мен бор жойда адолатга ўрин йўқ. Мени севсанг, сенга бу дунёда роҳат-фароғат ваъда қиламан, лекин нариги дунёда жаҳаннам оловлари ваъда қилинганини ҳам унутма!!!
