Кеча «Milliy TV» телеканалининг янги бир лойиҳаси «Дув-дув гап» кўрсатувида эксперт сифатида иштирок этдим ва жуда таъсирландим. Сабаб кўрсатув қаҳрамони (ачинарлиси, қаҳрамон билан бирга унинг 70 ёшдан ошган онаси ва олти ёшар ногирон фарзанди билан узоқ Намангандан ёрдам сўраб илинж билан Тошкентга келгани) Наманган вилояти Поп тумани Истиқбол маҳалласи Меҳр саҳоват уйида истиқомат қилувчи Нодиржон Мирзаноров ногирон ўғлини жарроҳлик операциясига эҳтиёж борлиги учун сарсону саргардон бўлмоқда.

Нодиржоннинг бу йўлда ўзини ҳар тарафга югуриб, минг бир найрангларга дучор бўлаётгани алоҳида мавзу. 2023 йилнинг октябрь ойидан буён Мирзаноровларнинг 6 ёшар ўғли Шодиёрбекнинг оғир хасталикка дучор бўлгани ва бу касалликни тезроқ даволамаса, унинг натижаси ёмон ҳолатлар билан тугаши мумкинлиги мушоҳада қилишга ундовчи ҳолатдир.

Кеча студияда шуларни эшитиб, бемор болага наманганлик шогирдларим ва танишларим орқали ёрдам бераман деган умидда Наманган вилоят ҳокимлигида фаолият юритаётган бир яқин танишимга телефон қилдим. Катта умидлар билан қилган қўнғироқларимга, афсус тезкор жавоб бўлмади фақатгина бир ярим кун деганда нарига томон менга қайта телефон қилди.

-Ассалому алайкум укажон, соғ саломатмисиз?

-Раҳмат Тўрабек ( уни мендан ёши кичик бўлса-да Тўрабек деб мурожаат қилгани ғашимга тегса-да бемор бола учун нимадир ундириш илинжида индамай қўя қолдим).

-Укажон бир наманганлик оиланинг бемор фарзандига ёрдам керак. шу боис сизга қўнғироқ қилгандим. Имконингиз бор биламан шу йигитга кўмак беринг

-Нима экан ўзи муаммо ? (Шу сўз юрагимга умидсизликни ёйди)

Шундан сўнг барча муаммоларни унга батафсил тушунтирдим. Узоқ сукутдан сўнг нариги томондан овоз чиқди. Тўрабек, бунақа оилалар бизда бисёр, ушбу оилага молиявий ёрдам кўрсата олмаймиз, фақатгина марказий касалхонадан йўлланмадан ёрдам беришимиз мумкин.

Рости умидим чиппакка чиқди. Гапиролмай ҳам қолдим. Мен 20 йиллик қадрдонимдан шу тарздаги муомалани кутмагандим. Во ажаб, мансаб, бойлик, кибрдан ташқари меҳр борлигини унутдик-микин. Балки бундай ёрдам сўраб келганлар кўпайиб кетганидан шундай жавоб бердимикан дея ўйланиб қолдим. Нима бўлганда ҳам умидим бошқача эди.

Қонун доирасида ёрдам берамиз деган сўзлар эса мени эса тинчлантира олмади… Эҳ афсус қани энди қўлимда имконият бўлса-ю, бутун бор имкониятимни солиб, шу болага ёрдам бера олсам.

Бугунги дам олиш куним уй хаёллар ва ташвишлар кунига айланди мен учун…..

Тўрабек Тўраев, журналист