Наманган “Ёш китобхон”лари аниқланди!

Бугун Наманган вилояти Давлатобод туманида жойлашган “Янги Ўзбекистон зиё маскани”да “Ёш китобхон” республика кўрик танловининг Наманган вилояти босқичига старт берилди. 12-13 февраль кунлари ўтказилиши режалаштирилган танловнинг биринчи кунида 10-14 ва 15-19 ёш тоифасидаги иштирокчилар ўзаро баҳс олиб боришди.

Танловни очиқ ва шаффоф ўтишини таъминлаш мақсадида иштирокчиларнинг билимлари республикадан ташриф буюрган ҳакамлар ва экспертлар томонидан баҳоланди.

“Бадиий асарлар билимдони” ҳамда “Тезкор савол-жавоб” шартлари орқали қизғин ва муросасиз баҳсларга бой бўлган танлов ҳакамларининг якуний хулосасига кўра, 10-14 ёш тоифасидаги иштирокчилар орасида фахрли 1-ўринни Эъзоза Мансуржонова (Чуст тумани) қўлга киритган бўлса, 2-ўрин Саодат Усмоновага (Поп тумани) ҳамда 3-ўрин Мафтуна Иброҳимжоновага (Мингбулоқ тумани) насиб этди.

Танловнинг 15-19 ёш тоифасидаги иштирокчилар орасидан эса, фахрли 1-ўринни Акбарали Меҳмонов (Косонсой тумани) қўлга киритган бўлса, 2-ўрин Дилобар Маҳмудовага (Тўрақўрғон тумани) ҳамда 3-ўрин Озода Турдалиевага (Норин тумани) насиб этди.

Танловнинг вилоят босқичида 10-14 ёш тоифаси бўйича 1-ўринни қўлга киритган Эъзоза Мансуржонова ва 15-19 ёш тоифаси бўйича 1-ўринни қўлга киритган Акбарали Меҳмоновлар танловнинг республика босқичида ҳам фахрли ўринни эгаллаган ҳолда, “Spark” автомашинасининг соҳиб ва соҳибаларига айланишларини тилаб қоламиз!

Эслатиб ўтамиз, эртага 13 феврал куни танловнинг 20-30 ёш тоифасидаги иштирокчилари ўртасидаги баҳслар давом этади.

Манба: Yoshlar ishlar agentligi Namangan viloyat boshqarmasi