Сурхондарёда Isuzu’га яширилган салкам 200 млн сўмлик пақилдоқлар тўхтатиб қолинди

Божхоначилар томонидан Сурхондарё вилояти «Дарбанд» ЙПХ масканида қиймати 194 миллион 175 минг сўм бўлган пиротехника воситалари тўхтатиб қолинди.

Сурхондарё вилояти божхона бошқармаси Контрабандага қарши курашиш бўлими томонидан олинган маълумотга асосан, 21 ноябрь куни вилоят ДХХ ва йўл-патруль хизмати ходимлари билан ҳамкорликда тезкор тадбир ўтказилди.

Тадбир натижасида Денов туманида яшовчи фуқаро Ж.А. бошқарувида бўлган Isuzu автотранспорт воситаси Бойсун тумани «Дарбанд» ЙПХ масканида холислар иштирокида тўхтатилган. Хизмат ити ёрдамида кўздан кечирилганда автотранспорт воситаси юкхонаси ичида қиймати 122 миллион 175 минг сўм бўлган 814 блокда 407 250 дона «Британик» номли ва қиймати 72 миллион сўм бўлган 480 блокда 240 000 дона «Трения» номли пиротехника воситалари борлиги аниқланди. Ушбу ҳолатда жами 194 миллион 175 минг сўм бўлган 647 250 дона пиротехника воситалари ашёвий далил сифатида олиниб, ҳолат юзасидан процессуал ҳужжатлар расмийлаштирилди.

Ҳозирда мазкур ҳолат юзасидан божхона органлари томонидан терговга қадар текширув ҳаракатлари олиб борилмоқда.