ҲУҚУҚИЙ ИСЛОҲОТЛАР МЕЗОНИ

Ўзбекистон Республикаси Конституцияси мамлакатимизда инсон ҳуқуқ-эркинликларини кафолатловчи муҳим ҳужжатдир. Уни ўқиш-ўрганиш ва ўз ҳуқуқларидан  фойдаланиш  барча  фуқароларнинг  бурчи ҳисобланади. Яна унда инсон  манфаатлари олий қадрият сифатида белгиланган. Муҳими, бугун ҳаётимизнинг  барча   жабҳаларида   Бош   қомусимиз   ифодасини   кўрамиз.  Тадбирда Наманган  вилояти  ҳамда туманлараро маъмурий судининг  судьялари университет талабаларига Конституциянинг мазмун-моҳияти, аҳамияти ва унга киритилган боб, бўлим, моддалар ҳақида тушунча ва   маълумотлар беришди.   

Юртимиздаги туб ислоҳот  ва  ўзгаришларнинг барчаси Бош қомусимиз  асосида амалга оширилмоқда. Бу эса халқимиз  манфаатларига, давлатимизнинг  стратегик мақсадларига тўла жавоб берадиган, ҳар томонлама пухта  ишланган  муҳим сиёсий ҳужжат эканидан далолат беради. Тадбирда   Конституциямизнинг  мустақил  Ватанимиз  тарихи,  бугунги миллий  давлатчилигимиз  тикланиши, унинг тадрижий тараққиётидаги ўрни ва  аҳамиятини  ҳеч  нарса   билан   қиёслаб  бўлмаслиги   аниқ    мисоллар   асосида   тушунтирилди.

Ҳар қандай демократик ислоҳотлар  самараси, тинчлик ва тараққиётнинг  асосий гарови   ҳам  Конституция  ва қонун устуворлиги таъминланиши  билан бевосита  боғлиқ.  Судлар  ва  тергов  идоралари  бирон-бир  иш   юзасидан  чиқарилган  қарор  бўйича  фуқароларнинг  жамоавий мурожаатларига  тушунтириш  ва  ҳуқуқий  изоҳлар  бериши   зарур. Шу  жиҳатдан   тадбирда    талабалар  Бош  қомусимизнинг  инсон  ҳаётидаги  ўрни   ва  судлар  фаолияти   билан  боғлиқ   ўзларини  қизиқтирган  саволларига  судьялардан   жавоблар   олишди.