“Аэрофлот” Санкт-Петербургдан Тошкент ва Самарқандга авиақатновларни йўлга қўймоқда

Россиянинг “Аэрофлот” авиакомпанияси Санкт-Петербург — Тошкент ва Санкт-Петербург — Самарқанд йўналишлари бўйича мунтазам парвозларни амалга оширади. Бу ҳақда Uzbekistan Airpords Матбуот хизмати хабар бермоқда. 

Санкт-Петербургдан Тошкентга биринчи йўловчи рейси 17 декабрга белгиланган. Парвозлар Boeing 738 самолётларида ҳафтасига уч марта — чоршанба, жума ва якшанба кунлари амалга оширилади.

Санкт-Петербургдан Самарқандга рейслар ҳам ҳафтасига уч марта — сешанба, пайшанба ва шанба кунлари Boeing 738 самолётларида амалга оширилади. Биринчи парвоз 16 декабрь куни амалга оширилиши режалаштирилган эди. Аммо, рейс 2022 йил 16 декабрдан 20 декабрга кўчирилди.

“Аэрофлот” — Россия ҳаво йўллари штаб-квартираси Москвада жойлашган Россиянинг давлат-хусусий авиакомпаниясидир. Аэрофлот гуруҳига, шунингдек, Rossiya авиакомпанияси ва Pobeda лоукостер авиакомпаниялари киради.

Тошкент – ​​Санкт-Петербург йўналиши бўйича бир томонлама нархлар 13 272 рублдан (Ўзбекистон Марказий банки курси бўйича 2,4 млн сўм), бориб келиш — 18 587 рублдан (3,37 млн сўм) бошланади.

Самарқанд – ​​Санкт-Петербург йўналиши бўйича чипта нархлари ҳали авиакомпания сайтида мавжуд эмас.