НамМТИда спорт устаси унвонини қўлга киритган талабалар тақдирландилар

Бугун Наманган муҳандислик-технология институтида спортнинг муай-тай тури бўйича совринли натижаларни қайд этиб, спорт устаси унвонига сазовор бўлган талаба-ёшларни тақдирлаш маросими ўтказилди. Унда бир гуруҳ оммавий ахборот воситалари вакиллари, журналистлар ҳамда блогерлар ҳам иштирок этишди.

Тадбирни ёшлар масалалари ва маънавий-маърифий ишлар бўйича биринчи проректор Маъруфжон Қаюмов очиб, ўз сўзида бугунги кунда институтда спорт билан шуғулланиш ва спорт турларини оммалаштириш борасида амалга оширилаётган ишлар, эришилаётган натижалар хусусида тўхталди.

Маълумот ўрнида айтиш керакки, бугун НамМТИда 2 ёпиқ 6 та очиқ спорт майдончалари талаба-ёшлар ихтиёрида бўлиб, спортнинг 20 дан ортиқ турлари билан шуғулланиш ва турли мусобақаларни ўтказиш имконияти яратилган. Жумладан, институтда сўнги йилларда спортнинг муай-тай тури кенг оммалашди. Мураббий институт спорт бўлими бошлиғи досент Улуғбек Қўчқоров бошчилигидаги жамоа аъзолари биргина муай-тай спорт тури бўйича салмоқли натижаларни қайд этишган. Шу вақтга қадар 35 нафар талаба спорт устаси унвони соҳиби, 120 нафари Ўзбекистон чемпиони 300 дан ортиқ талабалар Ўзбекистон Чемпионати мусобақаларида совринли ўринларни қўлга киритишгшани ҳам мазкур йўналиш бўйича ташкил этилаётган ишлар янги босқичга кўтарилганидан далолат бермоқда.

Шунингдек, тадбир давомида яна 3 нафар спортчи талабага Ўзбекистон Республикаси Спорт устаси унвони гувоҳномаси тантанали топширилди. Шундан сўнг оммавий ахборот воситалари вакиллари иштирокида институт спорт бўлими фаолияти бўйлаб пресс-тур ташкил этилди.

Журналистлар, спортнинг муай-тай тури билан шуғулланиб юқори натижаларни қайд этган спортчи талабаларнинг эришган ютуқларини ва спорт мажмуасида яратилган шароитлар билан яқиндан танишдилар.

©️Наманган муҳандислик-технология институти Ахборот хизмати