Хоразмда ўқувчининг онаси ва ўқитувчи ёқалашди

Ижтимоий тармоқларда Хоразм вилояти Хонқа туманидаги мактабларнинг бирида ўқувчининг онаси ва ўқитувчи ўзаро жанжаллашгани акс этган видео тарқалди. Бош прокуратура ҳолат юзасидан жиноят иши қўзғатилганини маълум қилди.

Қайд этилишича, 15 октябрь куни Хоразм вилоятининг Хонқа туманидаги 36-сон умумий ўрта таълим мактабида ўқувчининг онаси С.Р. ва ўқитувчи Г.Р. (аёл) ўртасида зиддият келиб чиқиб, уришиб кетган.

Ҳолат юзасидан ички ишлар органи томонидан суриштирув ҳаракатлари олиб борилиб, фуқаро С.Р.га Маъмурий жавобгарлик тўғрисидаги кодексининг 41 (туҳмат) ва 52 (енгил тан жароҳати етказиш) моддалари 2-қисми, Г.Р.га нисбатан МЖтКнинг 52-моддаси 1-қисми билан маъмурий ҳуқуқбузарликка оид иш қўзғатилиб, тўпланган ҳужжатлар кўриб чиқиш учун судга юборилган.

Мазкур қарор прокуратура томонидан назорат тартибида ўрганилиб, асоссиз бўлгани сабабли бекор қилинган ва 18 ноябрь куни фуқаро С.Р.га нисбатан Жиноят кодексининг 277-моддаси 2-қисми “а” банди (безорилик, баданга ўртача оғир шикаст етказиб) билан жиноят иши қўзғатилган.

Ҳозирда жиноят иши тергов ҳаракатларини ўтказиш учун ички ишлар органига юборилган. Жиноят иши тергови Хоразм вилояти прокуратураси томонидан назоратга олинган.