Ёнғин: Бухоро вилояти ҳудудидан ўтган магистрал газ қувурида газ сизиб чиқди

Расмий муносабат

Бугун, 10-феврал куни Бухоро вилояти ҳудудидан ўтган, диаметри 1020 мм бўлган магистрал газ қувурида газ сизиб чиқиш ҳолати кузатилган ҳамда ёнғин содир бўлган.

Энергетика вазирлиги Ахборот хизмати хабарига кўра, ҳозирги вақтда мазкур ҳолатни бартараф этиш бўйича барча зарурий чоралар кўрилмоқда.

Бирламчи маълумотга кўра ёнғин натижасида жабрланганлар ҳамда тан жароҳати олганлар йўқ.

Фавқулотда вазиятлар вазирлиги Ахборот хизмати ҳудудий бошқармаси хабарига кўра, авария содир бўлган ҳудудда олиб борилган тезкор ҳаракатлар натижасида соат 11:30 газ муруватлари ёпилиб, қолдиқ газларни чиқиб кетиши кузатилган. Ҳозирда авария тўлиқ бартараф этилди.

Воқеа жойига тегишли вазирлик идоралари вакиллари етиб боргани маълум қилинади.

Jurnalist24 axboroti