7 avgust kuni shahrimizdagi «Oydin plaza» mehmonxonasining majlislar zalida boʻlib oʻtgan matbuot anjumani “Tadbirkorlarga yaratilayotgan shart-sharoitlar, ularning rivojlanishi hamda muammolarni hal etishga qaratilgan masalalar” mavzusiga bagʻishlandi.

Namangan viloyati tashqi savdo va investitsiyalar boshqarmasi tomonidan tashkil etilgan ushbu anjumanda viloyatimizdagi yirik tadbirkorlik subʼektlari rahbarlari, viloyat tashqi savdo va investitsiyalar boshqarmasi boshligʻining birinchi oʻrinbosari Nodirbek Abdullayev, shahar hokimining oʻrinbosari Mubashsher Adhamov hamda OAV vakillari, jurnalist, blogerlar ishtirok etdilar.

Viloyatimizda raqobatbardosh tayyor mahsulotlar ishlab chiqarish hajmlarini oshirish, toʻgʻridan-toʻgʻri xorijiy investitsiyalarni keng jalb qilish, investitsiya loyihalarining ijtimoiy-iqtisodiy samaradorligini taʼminlash hamda shu asosda yuqori daromadli ish oʻrinlari yaratib kelinayotgani anjumanda alohida taʼkidlandi. keyingi besh yil davomida viloyatimizda tadbirkorlar uchun yaratilgan sogʻlom muhit, ularning murojaatlari bilan ishlash, zarur shart-sharoitlar boʻyicha alohida toʻxtalib oʻtildi.

Shuningdek, matbuot anjumanida jurnalist va blogerlar tomonidan viloyatimizda investitsiyalarni jalb etish borasida savollar mutasaddilarga yoʻllandi. Ular tomonidan amalga oshirilayotgan ishlar boʻyicha atroflicha tushuntirish berildi.