Фарғона вилояти ички ишлар бошқармаси ахборот хизмати Риштон туманида 28 ноябрь куни содир этилган ЙТҲ юзасидан маълумот берди.

Қайд этилишича, соат 09:30 да Риштон тумани Бўстон қишлоғи ҳудуди бўйлаб ҳаракатланиб кетаётган туман ИИБ ходими лейтенант Ҳ.М. бошқарувидаги Spark йўлнинг носоз қисмида техник шикастланиши оқибатида бошқарувни йўқотган. Сўнг йўлнинг қарама-қарши томонига ўтиб кетиши оқибатида шу йўлда ҳаракатланиб келаётган ҳайдовчи Ҳ.Ш. бошқарувидаги Damas билан тўқнашган. Транспорт воситаларининг ҳайдовчилари ҳушёр ҳолатда бўлган.

Содир этилган йўл-транспорт ҳодисаси оқибатида Spark ҳайдовчиси Ҳ.М., Damas ҳайдовчиси Ҳ.Ш. ҳамда унинг 3 нафар йўловчиси турли даражадаги тан жароҳатлари билан шифохонага ётқизилган. Ҳозирда ҳолат юзасидан туман прокуратураси томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, тергов ҳаракатлари олиб борилмоқда.