Катта Чимён тоғида адашиб қолган тўрт киши қутқарилди

Бўстонлиқ туманидаги Катта Чимён тоғида адашиб қолган 4 киши қутқарилди. Улар сайр қилиш мақсадида бориб, йўлини йўқотиб қўйган.

Тошкент вилоятининг Бўстонлиқ туманидаги тоғда йўлдан адашиб қолган фуқаролар қутқарилди. Бу ҳақда Фавқулодда вазиятлар вазирлиги хабар қилди.

Қайд этилишича, 21 сентябрь куни соат 16:15 да Тошкент вилояти ФВБга Бўстонлиқ тумани Чимён маҳалла ҳудудидаги Катта чимён тоғига тўрт нафар фуқаро сайр қилиш мақсадида бориб, йўлдан адашиб қолганлиги ҳақида хабар келиб тушган.

Хабарга асосан, Чимён ёнғин-қутқарув отрядидан бир гуруҳ қутқарувчилар зудлик билан айтилган манзилга етиб бориб, фуқаролар хавфсиз ҳудудга олиб тушилган. Тан жароҳати олган йўқ, дейилади хабарда.