Энди телефон, планшет, ноутбуклар мутахассис иштирокида кўздан кечирилади

Яқинда Жиноят процессуал кодексга бир қатор қўшимчалар киритилиб, “Электрон маълумотлар” ва “Рақамли далиллар” тушунчаси ойдинлаштирилган иккита модда қўшилди.

Қодексда электрон маълумотлар электрон қурилмалардан ва ахборот тизимларидан, шунингдек ахборот технологияларидан фойдаланган ҳолда яратиладиган, ишлов бериладиган ҳамда сақланадиган маълумотлар сифатида кўрсатилган.

Иш учун аҳамиятга эга бўлган ҳолатлар тўғрисидаги маълумотлар мавжуд бўлган электрон маълумотлар, шу жумладан электрон тарздаги файллар, аудио-, видеоёзувлар, Интернет жаҳон ахборот тармоғида сақланаётган маълумотлар, шунингдек бошқа электрон маълумотлар рақамли далиллардир.

Аҳамиятлиси, янги 204-1-моддага кўра, терговга кадар текширувни амалга ошираётган органнинг мансабдор шахси, суриштирувчи, терговчи, прокурор ёки суд тақдим этилган электрон маълумотларни мутахассис иштирокида қабул қилиб олади ҳамда электрон маълумотлар мавжуд бўлган бирламчи электрон жисмларни кўздан кечиради.

Бу дегани, сизнинг телефон, планшет, ноутбук, компьютер каби қурилмаларингизни махсус ходимлар кўздан кечирмоқчи бўлишса мутахассисни чақириб, камида иккита холис гувоҳ иштирокида кўздан кечиради. Ўз билганича кўздан кечириш мумкинмас.

Олиб қўйишда ҳам шу тартибга амал қилинади.

Бу кўздан кечириш бахонасида ташқаридан телефон ва бошқа қурилмаларга таъқиқланган материал ташлаб, сўнг сохта айбловлар уюштирилишининг олдини олади.

Манба @r_kusherbayev