Энди ҳайдовчилар биринчи тиббий ёрдам кўрсатиш учун махсус тайёргарликдан ўтиши керак. Нарҳи қанча?
Маълумингиз ким, “Янги Ўзбекистон” деб аталгувчи тинч-тотув диёримида янгидан-янги ўзгаришлар учун ҳукмлар чиқарилмоқда. Бунда темир улов устида юрадиган ҳайдовчиларга темир ирода тилашдан бошқа чорамиз йўқ. Ягона ҳукмрон тизим деб топилмаган, бироқ, ишлаб чиқарувчи томонидан “минсанг шу, минмасанг икки ҳисса бож тўлаб бошқа ол” қабилида тақдим этилган темир-уловлардан кўзлармиз тўртбурчак бўлди ва адолат излаб бошимизни гунг қилдик. Бир муддат “Автотест”дан қутулганимизга шукур қилиб, “кўланкамиз кенг майдон” дея хотиримиз жам эди. Пақа-пақ этиб “Ягона имтиҳон марказ”лари ишга туширилди. Энди эса яна бир бошқа майна чекимизга тушиб турибди. Буни қарангки, соғлиқни сақлаш вазирлигининг янги ҳукми лойиҳасида ҳайдовчилар тиббиёт илмини ўқиши зарур экан. Хабарингиз бўлса, ҳайдовчиларга қўшимча мажбурият юклаш пойқадамида бўлган, ҳали тасдиқланиб улгурилмаган буйруқ блогер ва интернет матбуотчиларининг назаридан четда қолмади.
Ҳамири ачимаган ушбу буйруқ лойиҳаси 9-июль кунига қадар муҳокамада бўлади. Таажжубким, соғлигимизни сақлашга бел боғлаган вазирлик, пулимизни ҳам шилишга бел боғламаган бўлса бўлгани. Ҳозирда лойиҳага мамлакат тақдирига бефарқ бўлмаган 36 нафар жонкуяр томонидан таклиф киритилган бўлиб, уларнинг 31 таси қарши фикр билдиришган.
Энди мундоқ ўтмишга назар ташласак, 2018 йилда Комилжон Алламжонов томонидан асос солинган “Автотест” монополияси тугатилган эди. Фаратгина юридик шахслар ҳайдовчиларини ўқитиш илинжида кун кечирган ташкилот бир йил ўтиб чарчади. 2019 йилда “Автотест” жамоаси юридик шахслар ҳайдовчиларини ўқитиш фаолиятини тўхтатганини маълум қилди. 2022 йилнинг февраль ойида Автотест билан айни манзилда рўйхатга олинган Autodriver Study компанияси ҳайдовчилик гувоҳномаси учун имтиҳон топширишга мўлжалланган Ягона имтиҳон марказини ишга туширди. К ўк форма эгалари ҳам ўз тасарруфида бўлган имтиҳон олиш бўлимларини ёппасига тўхтатиб қўя қолди. Бу ишларга албатта Вазирлар Маҳкамаси раҳнамолик қилди.
Энди бу борадаги норматив-ҳуқуқий ҳужжатларга эътибор қаратамиз. Президентнинг 2020 йил 7 декабрдаги қарори билан давлат тизимидаги бир қатор соҳаларга тадбиркорлар жалб этилиши белгиланди. Вазирлар Маҳкамаси эса 2021 йил 5-майда ижро юзасидан янги қарор чиқариб, коса тагида ним коса билан ИИВ таркибидаги Давлат йўл ҳаракати хавфсизлиги хизматининг назарий ва амалий имтиҳонларни ўтказиш бўйича фаолиятини тўхтатишни буюрди. Ваҳоланки, порахўрликка қарши курашиш учун давлатнинг имтиҳон олиш тизимини қайта ислоҳ қилиш истаги бирор амалдор чекига тушмади ҳам. Президент қарорида вазирлик иҳтиёрида бўлиб турган имтиҳонларни ўтказиш бўлимларини ёппасига тўхтатиб қўйиш наразда тутилмаган бўлсада, Вазирлар Маҳкамаси қарори Autodriver Study ҳусусий тадбиркори томонидан рақобатсиз бозорни эгаллашига, имтиҳон олиш учун нархларни истаганча оширишга замин яратди. Холбуки, мазкур ҳусусий сектор оёққа туриб, имтиҳон олиш марказлари сони ва бу борада ишловчи тадбиркорлар10 тадан ошгандан сўнг, ҳаққоний рақобат ўрнатилгунга қадар Ички ишлар вазирлиги тасарруфидаги имтиҳон олиш бўлимлари мувозанат учун фаолият юритиши, қайта ислоҳ қилиниши зарур эди.
Хўш…Президент қарорида радарларнинг ҳам ҳусусийлаштирувга ўтиш бўйича вазифалар юклатилган эди. Бироқ, Ички ишлар вазирлиги тасарруфидаги фото-радарлар ёппасига олинмади, бу йўналишдаги фаолият тўхтатилмади.
Бир неча йилки, айнан ҳайдовчилар чекига тош босилмоқда. Сабаби бир амалдор борки, мазкур йўналишда катта манфаат болигини сезиб қолди. Ўз мақсадларини амалга ошириш учун тинчимади, тўхтамади ва ниҳоят мўлжални олди. Янги ҳусусий имтиҳон марказлари кўпайиб, ҳаққоний рақобат бозори вужудга келиши молиявий қулаш эди. Мана энди ҳусусий марказда имтиҳон топшириш нарх-наволари ҳам баланд. Ваҳоланки, нархларни 2 баробар пастлатишганида ҳам даромадлари мўл бўлиши табиий эди. Тадбиркор биринчи навбатда пулни кўзлайди. Кичик сармоядан катта даромад олишни ким ҳам хоҳламайди дейсиз? Унга халқнинг чеки тушмаган. Халқимизни ўйловчи “меҳрибонлар” эса юқорининг топшириғини бажариш баҳонасида пул келувчи қувурни ишга туширдилар. Бу масалага биз эмас балки, Бош прокуратура, Монополияга қарши курашиш қўмитаси, Давлат хавфсизлиги хизмати, Ички ишлар вазирлиги ечим бериши зарур. Биз ёзаверамиз, фикрларимиз ўқилиб ёки ўқилмай қолаверади. Лекин, бир кун келиб тарих албатта ўз сўзни айтади.
Дипломи бор журналист